شيار أو البوشيار على طريقة بجعد

  • ⴰⵣⵓⵍ
  • السلام عليكم البنات، شخباركم لباس عليكم؟ نتمنى تكونو بالف خير و صحة و سلامة . 

     ترددت بزااف باش نزل هاد الموضوع لانني قلت اكيد جميع الانيقات كيعرفو يصوبو البوشيار، انما رجعت قلت نزلو نشوف غير من راسي و كاكان معلمتنيش لوستي طريقتو عمري ما كنت نعرف نصوبو لان بصراحة ففاس عمرنا ما درنا البوشيار و لا عرفتو حتى تزوجت. المهم بلا ما نزيد نطول فالهضرة , هو راه ساهل ماهل و ما فيهش المقادير بزاف , على بركة الله نبداو 

    المقادير:

    1.   زلافة ديال الطحين الفورص. 
    2.  زلافة ديال الفينو. 
    3.  بيضة . 
    4. خميرة. 
    5.  معلقة سنيدة. 
    6.  ملح و ماء دافئ لجمع العجين . 
    7. شويش زيت باش ندهنو يدينا. 
    8.  زبيدة بلدية (الى مكانتش ديري زبدة عادية مع شويش ديال السمن). 
    9.  عسيلة حرة ما كانتش ديري عسل عادي. 

    الطريقة :

    1.  كنجمعو العجينة فنفس الوقت و انا كنزيد فالماء حتى كتولي لعجينة فحال ديال السفنج كيفما فالصورة أسفله. 
    2. كنغطيها و نخليها تخمر مزيان. 
    3.  من بعد ما خمرات كندهن يدي بزويتة. 
    4. و نقطع كويرة من العجينة. 
    5. و نكرصها فالفينو و تكون رقيقة. 
    6. و نطيبها مباشرة يعني تقطع و تكرص. 
    7. وترش المقلة الثقيلة بشوية ديال الزيت. 
    8. و مباشرة طيب على عافية متوسطة. 
    9.  منين نشوفو الخبيزة بدات كدير الفقاعات نقلبها على الجهة الاخرى حتى طيب من جوج جهات. 
    10.  في مقلاة ندير الزبدة و العسل و السمن يدوبو. 
    11. و نغطس فيهم البوشيارة حتى يترطب من جوج جوايه حتى نكملو الكمية. 
    12. و نقدموهوم سخان مع شي بريرد ديال اتاي بشيبة فهاد البرد هادشي لي كيصلاح. 

     اوا و بالصحة و الراحة 💜😘